A igrexa de Santa María de Sar sufriu ao longo da súa historia numerosas transformacións que alteraron o seu primitivo proxecto románico e déronlle a imaxe que presenta hoxe en día. A adicción dunhas pesadas bóvedas no século XV provocou a inclinación progresiva de toda a estrutura, que tivo que ser en parte reconstruída no século XVIII. Esta intervención, aínda que garantiu a supervivencia do templo ata a actualidade, motivou a construción dos grandes arbotantes do exterior, así como a desaparición da metade superior da fachada románica.
Agora, tras un longo proceso de investigación histórica, preséntase esta reconstrución virtual do aspecto que presentaría a igrexa no século XIII, ao tempo da finalización das súas obras. O máis rechamante, ademais da ausencia dos arbotantes exteriores, moi posteriores, é a fachada oeste cos tres rosetóns dos que dispuxo orixinalmente. Tamén a ausencia de bóvedas no interior e a presenza dun falso triforio sobre as arquerías que separan as naves.
Este proxecto de reconstrución virtual realizouse a través da convocatoria de axudas destinadas a Centros Museísticos da Consellería de Cultura, Lingua e Xuventude da Xunta de Galicia e no marco dun contrato de I+D entre o Arcebispado de Santiago de Compostela e a Universidade de Vigo, IN-0372-24.
